ملګرو ملتونو له روسیې او اوکرایین وغوښتل چې ملکي خلکو ته خوندي لار ورکړي
د ملګرو ملتونو بشري مرستو چارو مشر مارټین ګریفیتس له روسیې او اوکرایین غوښتي چې له جګړې د تښتېدونکو خلکو خوندیتوب باوري کړي او دغه راز بشري مرستو ته اجازه ورکړي چې جګړه ځپلو سیمو ته ورسېږي.
ملګرو ملتونو او ملګرو خیریه بنسټونو یې د اوکرایین سلګونه زره خلکو لپاره خواړه چمتو کړي، خو په ځینو سیمو کې یې د امنیت نشتوالي له کبله رسول ستونځمن دي.
په دې هکله د ملګرو ملتونو دا څرګندونې داسې مهال مخې ته راځي چې دواړه لوري پر یوه یوه بل د ملکي خلکو ایستلو خوندي لارو مخنیوي تورونه پورې کوي.
په ملګرو ملتونو کې د اوکرایین استازي روسي ځواکونه تورن کړي، چې اروپا ته د ملکي خلکو د تلو پر لارو بریدونه کوي او دغه راز د بشري مرستو مخه نیسي.
خو په ملګرو ملتونو کې د روسیې استازی بیا دا تورونه ردوي او له ثبوتونو پرته ادعا کوي چې اوکرایین د خلکو خوندي وتلو مخه نیسي.
ښاغلي ګریفیتس بیا د ملګرو ملتونو امنیت شورا ته وویل، دوی مسکو ته په دې تمه یو پلاوی استولی چې په اوکرایین کې له سختو اړمنو سره د مرستې لپاره خبرې وشي.