You’re viewing a text-only version of this website that uses less data. View the main version of the website including all images and videos.
ਗਲਾਸਗੋ ਵਿੱਚ 31 ਅਕਤੂਬਰ ਤੋਂ 12 ਨਵੰਬਰ ਤੱਕ ਹੋਣ ਵਾਲੇ ਸਿਖਰ ਸੰਮੇਲਨ ਨੂੰ ਜਲਵਾਯੂ ਤਬਦੀਲੀ ਨੂੰ ਕਾਬੂ ਵਿੱਚ ਲਿਆਉਣ ਲਈ ਅਹਿਮ ਮੰਨਿਆ ਜਾ ਰਿਹਾ ਹੈ
Climate Change: ਹਾਲ ਹੀ ਵਿੱਚ ਹੋਏ ਮੌਸਮੀ ਬਦਲਾਅ ਨੇ ਚਾਹ ਉਦਯੋਗ ਲਈ ਜਾਣੇ ਜਾਂਦੇ ਅਸਾਮ ਦੇ ਚਾਹ ਦੇ ਬਾਗਾਂ ਉੱਤੇ ਅਸਰ ਪਾਇਆ ਹੈ ਅਤੇ ਚਾਹ ਦੀ ਗੁਣਵੱਤਾ ਨੂੰ ਵੀ ਪ੍ਰਭਾਵਿਤ ਕੀਤਾ ਹੈ। ਇਸੇ ਮਸਲੇ 'ਤੇ ਬੀਬੀਸੀ ਪੱਤਰਕਾਰ ਰਾਂਘਵੇਂਦਰ ਰਾਓ ਚਾਹ ਉਦਯੋਗ ਨਾਲ ਜੁੜੇ ਲੋਕਾਂ ਨਾਲ ਗੋਲਾਘਾਟ (ਅਸਾਮ) ਤੋਂ ਗੱਲ ਕਰ ਰਹੇ ਹਨ
(ਕੈਮਰਾ - ਪੀਯੂਸ਼ ਨਾਗਪਾਲ)
ਸਕਾਟਲੈਂਡ ਦੇ ਗਲਾਸਗੋ ਵਿੱਚ ਚੱਲ ਰਹੇ ਵਾਤਾਵਰਨ ਤਬਦੀਲੀ ਸੰਮੇਲਨ ਵਿੱਚ 200 ਦੇਸ਼ਾਂ ਦੇ ਡੈਲੀਗੇਟ ਇਕੱਠੇ ਹੋਏ ਹਨ।
ਫਿਲਮ ਸਟਾਰ ਲਿਓਨਾਰਡੋ ਡੀ ਕੈਪਰੀਓ ਨੇ ਉਸੇ COP 26 ਸੰਮੇਲਨ ’ਤੇ ਇਹ ਟਵੀਟ ਕੀਤਾ -
“ਜਲਵਾਯੂ ਸੰਕਟ ਆ ਗਿਆ ਹੈ। #COP 26 ਕਾਨਫਰੰਸ ਲੋਕਾਂ ਅਤੇ ਧਰਤੀ ਗ੍ਰਹਿ ਦੀ ਰੱਖਿਆ ਲਈ ਇੱਕ ਅਹਿਮ ਮੋੜ ਬਣਨਾ ਚਾਹੀਦਾ ਹੈ। ਲੀਡਰਜ਼, ਦੁਨੀਆ ਤੁਹਾਨੂੰ ਦੇਖ ਰਹੀ ਹੈ ਅਤੇ ਉਮੀਦ ਕਰ ਰਹੀ ਹੈ ਕਿ ਤੁਸੀਂ ਇਸ ਮੌਕੇ 'ਤੇ ਖਰਾ ਉਤਰੋਗੇ। ਅਸੀਂ ਹੋਰ ਸਮਾਂ ਬਰਬਾਦ ਨਹੀਂ ਕਰ ਸਕਦੇ।”
ਕੁੱਲ ਆਲਮ ਵਿੱਚ ਬਦਲਦੇ ਵਾਤਾਵਰਨ ਦੇ ਪੰਜਾਬ ਲਈ ਕੀ ਮਾਅਨੇ ਹਨ? — ਇਸੇ ਬਾਰੇ ਬਾਘਾਪੁਰਾਣਾ (ਮੋਗਾ) ਵਿਖੇ ਵਾਤਾਵਰਨ ਮਾਹਰਾਂ ਪ੍ਰੋ. ਰਾਘਵੇਂਦਰ ਪ੍ਰਸਾਦ ਤਿਵਾੜੀ ਅਤੇ ਡਾ. ਵੀ ਕੇ ਗਰਗ ਸਣੇ ਵਾਤਾਵਰਨ ਲਈ ਕੰਮ ਕਰਨ ਵਾਲੇ ਕੁਝ ਲੋਕਾਂ ਨਾਲ ਗੱਲਬਾਤ ਕਰ ਰਹੇ ਹਨ ਬੀਬੀਸੀ ਪੱਤਰਕਾਰ ਖ਼ੁਸ਼ਹਾਲ ਲਾਲੀ
(ਕੈਮਰਾ - ਮਯੰਕ ਮੋਂਗੀਆ)
ਪ੍ਰਿੰਸ ਆਫ ਵੇਲਜ਼ ਅੱਜ ਸ਼ਾਮ ਸਕਾਟਲੈਂਡ ਵਿੱਚ COP26 ਸੰਮੇਲਨ ਨੂੰ ਸੰਬੋਧਨ ਕਰਨਗੇ। ਉਹ ਆਪਣੇ ਭਾਸ਼ਣ ਵਿੱਚ ਕਹਿਣ ਵਾਲੇ ਹਨ ਕਿ ਵਾਤਾਵਰਨ ਸੰਕਟ ਨਾਲ ਨਜਿੱਠਣ ਲਈ "ਜੰਗੀ ਪੱਧਰ" 'ਤੇ ਕੰਮ ਕਰਨ ਦੀ ਲੋੜ ਹੈ।
ਗਲਾਸਗੋ ਵਿੱਚ ਕਾਨਫਰੰਸ ਦੇ ਉਦਘਾਟਨੀ ਸਮਾਰੋਹ ਵਿੱਚ, ਪ੍ਰਿੰਸ ਚਾਰਲਸ ਵਿਸ਼ਵ ਦੇ ਨਿੱਜੀ ਖੇਤਰ ਦੇ ਸਰੋਤਾਂ ਦੀ ਵਰਤੋਂ ਕਰਦੇ ਹੋਏ ਵਾਤਾਵਰਨ ਤਬਦੀਲੀ ਦੇ ਵਿਰੁੱਧ ਮੁਹਿੰਮ ਚਲਾਉਣ ਦਾ ਸੱਦਾ ਦੇਣ ਜਾ ਰਹੇ ਹਨ।
ਚਾਰਲਸ ਸੀਓਪੀ 26 ਸੰਮੇਲਨ ਵਿੱਚ ਸ਼ਾਮਲ ਹੋਣ ਲਈ ਬ੍ਰਿਟਿਸ਼ ਸ਼ਾਹੀ ਪਰਿਵਾਰ ਦੇ ਸਭ ਤੋਂ ਸੀਨੀਅਰ ਵਿਅਕਤੀ ਹੋਣਗੇ।
ਚਾਰਲਸ ਨੇ ਸਕਾਟਲੈਂਡ ’ਚ ਹੋ ਰਹੇ ਇਸ ਸੰਮੇਲਨ ਨੂੰ 'ਆਖਰੀ ਮੌਕਾ' ਕਿਹਾ ਹੈ। ਉਹ ਲੰਬੇ ਸਮੇਂ ਤੋਂ ਵਾਤਾਵਰਨ ਦੇ ਮੁੱਦੇ ਉਠਾਉਂਦੇ ਆ ਰਹੇ ਹਨ ਅਤੇ ਅੱਜ ਆਪਣੇ ਭਾਸ਼ਣ ਵਿੱਚ ਉਹ ਵਾਤਾਵਰਨ ਤਬਦੀਲੀ ਸੰਕਟ ਨੂੰ ਤੁਰੰਤ ਹੱਲ ਕਰਨ 'ਤੇ ਜ਼ੋਰ ਦੇ ਸਕਦੇ ਹਨ।
ਅੱਜ ਸ਼ਾਮ ਨੂੰ ਆਪਣੇ ਭਾਸ਼ਣ ਵਿੱਚ ਪ੍ਰਿੰਸ ਚਾਰਲਸ ਕਹਿਣਗੇ, “ਸਾਨੂੰ ਜੰਗੀ ਪੱਧਰ ‘ਤੇ ਤਿਆਰੀ ਕਰਨੀ ਪਵੇਗੀ। ਸਾਨੂੰ ਇੱਕ ਫੌਜੀ-ਸ਼ੈਲੀ ਦੀ ਮੁਹਿੰਮ ਚਲਾਉਣੀ ਪਵੇਗੀ ਜੋ ਦੁਨੀਆ ਦੇ ਨਿੱਜੀ ਖੇਤਰ ਦੀ ਤਾਕਤ ਨੂੰ ਵੀ ਵਰਤ ਸਕਦੀ ਹੈ, ਜਿਸ ਕੋਲ ਖਰਬਾਂ ਡਾਲਰ ਹਨ।”
ਐਤਵਾਰ ਨੂੰ, ਪ੍ਰਿੰਸ ਚਾਰਲਸ ਨੇ ਰੋਮ ਵਿੱਚ ਜੀ-20 ਸੰਮੇਲਨ ਦੌਰਾਨ ਵਿਸ਼ਵ ਨੇਤਾਵਾਂ ਨੂੰ ਸੰਬੋਧਨ ਕੀਤਾ।
ਉਨ੍ਹਾਂ ਨੇ ਕਿਹਾ ਸੀ, "ਆਪਣੇ ਮਤਭੇਦਾਂ ਨੂੰ ਭੁਲਾ ਕੇ, ਇਸ ਮੌਕੇ ਦਾ ਫਾਇਦਾ ਉਠਾਉਂਦੇ ਹੋਏ, ਸਾਨੂੰ ਸਾਰਿਆਂ ਨੂੰ ਗ੍ਰੀਨ ਰਿਕਵਰੀ ਵੱਲ ਵਧਣਾ ਹੋਵੇਗਾ ਤਾਂ ਜੋ ਵਿਸ਼ਵ ਅਰਥਵਿਵਸਥਾ ਨੂੰ ਭਰੋਸਾ ਮਿਲੇ ਅਤੇ ਅਸੀਂ ਆਪਣੇ ਗ੍ਰਹਿ ਨੂੰ ਬਚਾ ਸਕੀਏ।"
2018 ਵਿੱਚ, ਸੇਫਾਨ ਗੋਸਲਿੰਗ ਅਤੇ ਉਨ੍ਹਾਂ ਦੀ ਟੀਮ ਨੇ ਪੈਰਿਸ ਹਿਲਟਨ ਤੋਂ ਓਪਰਾ ਵਿਨਫਰੇ ਤੱਕ ਅਮੀਰ ਲੋਕਾਂ ਦੇ ਸੋਸ਼ਲ ਮੀਡੀਆ ਪ੍ਰੋਫਾਈਲਾਂ ਨੂੰ ਘੋਖਣ ਵਿੱਚ ਮਹੀਨੇ ਬਿਤਾਏ।
ਸਵੀਡਨ ਦੀ ਲੀਨੇਅਸ ਯੂਨੀਵਰਸਿਟੀ ਵਿੱਚ ਸੈਰ-ਸਪਾਟੇ ਦੇ ਪ੍ਰੋਫੈਸਰ ਗੋਸਲਿੰਗ ਨੇ ਇਹ ਜਾਣਨਾ ਚਾਹਿਆ ਕਿ ਇਹ ਲੋਕ ਜਹਾਜ਼ ਵਿੱਚ ਕਿੰਨਾ ਸਫ਼ਰ ਕਰਦੇ ਹਨ।
ਉਨ੍ਹਾਂ ਨੇ ਦੇਖਿਆ ਕਿ ਇਸ ਦੀ ਗਿਣਤੀ ਬਹੁਤ ਜ਼ਿਆਦਾ ਸੀ। ਦੁਨੀਆ ਭਰ ਵਿੱਚ ਵਾਤਾਵਰਨ ਦੇ ਮੁੱਦਿਆਂ 'ਤੇ ਆਵਾਜ਼ ਚੁੱਕਣ ਵਾਲੇ ਬਿਲ ਗੇਟਸ ਨੇ 2017 ਵਿੱਚ 59 ਵਾਰ ਹਵਾਈ ਯਾਤਰਾ ਕੀਤੀ।
ਗੋਸਲਿੰਗ ਦੀ ਗਿਣਤੀ ਦੇ ਅਨੁਸਾਰ, ਉਨ੍ਹਾਂ ਨੇ 3,43,500 ਕਿਲੋਮੀਟਰ ਦੀ ਦੂਰੀ ਤੈਅ ਕੀਤੀ।
ਇਹ ਪੂਰੇ ਸੰਸਾਰ ਦੇ ਅੱਠ ਤੋਂ ਵੱਧ ਵਾਰ ਚੱਕਰ ਲਗਾਉਣ ਦੇ ਬਰਾਬਰ ਹੈ ਅਤੇ ਇਸ ਨਾਲ 1,600 ਟਨ ਗ੍ਰੀਨਹਾਊਸ ਗੈਸਾਂ ਦਾ ਨਿਕਾਸ ਹੋਇਆ।
ਇਹ ਪ੍ਰਤੀ ਸਾਲ 105 ਅਮਰੀਕੀਆਂ ਦੇ ਔਸਤ ਨਿਕਾਸ ਦੇ ਬਰਾਬਰ ਹੈ।
ਗੋਸਲਿੰਗ ਦੀ ਕੋਸ਼ਿਸ਼ ਇਹ ਪਤਾ ਲਗਾਉਣ ਦੀ ਸੀ ਕਿ ਇੱਕ ਬਹੁਤ ਹੀ ਅਮੀਰ ਵਿਅਕਤੀ ਜਿਸ ਦੇ ਜੀਵਨ ਬਾਰੇ ਅਸੀਂ ਬਹੁਤ ਕੁਝ ਨਹੀਂ ਜਾਣਦੇ, ਦੇ ਜੀਵਨ ਢੰਗ ਦੁਆਰਾ ਕਿੰਨੀ ਗ੍ਰੀਨਹਾਊਸ ਗੈਸਾਂ ਦਾ ਨਿਕਾਸ ਹੁੰਦਾ ਹੈ।
ਪੂਰੀ ਖ਼ਬਰ ਪੜ੍ਹਨ ਲਈ ਇੱਥੇ ਕਲਿੱਕ ਕਰੋ।
ਯੂਕੇ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਨੇ ਕਿਹਾ ਕਿ ਬਦਲਾਅ ਦੀ ਘੜੀ ਸ਼ੁਰੂ ਹੋਣ ਵਾਲੀ ਹੈ ਅਤੇ ਦੁਨੀਆ ਵਾਤਾਵਰਨ ਤਬਦੀਲੀ ਨਾਲ ਨਜਿੱਠਣ ਲਈ ਕੁਝ ਸਮਾਂ ਹੀ ਦੂਰ ਹੈ।
ਉਨ੍ਹਾਂ ਕਿਹਾ ਕਿ ਗਲੋਬਲ ਵਾਰਮਿੰਗ ਵਿਰੁੱਧ ਹੁਣ ਇਹ ਦੇਸ਼ ਯੋਜਨਾਵਾਂ ਨੂੰ ਐਕਸ਼ਨ ਵਿੱਚ ਤਬਦੀਲ ਕਰਨ ਲਈ ਇੱਕਠੇ ਹੋਏ ਹਨ।
ਉਨ੍ਹਾਂ ਕਿਹਾ ਕਿ ਉਹ ਇਸ ਕਾਨਫਰੰਸ ਨੂੰ ਲੈ ਕੇ ਕਾਫ਼ੀ ਗੰਭੀਰ ਹਨ ਅਤੇ ਇਹ ਉਨ੍ਹਾਂ ਲਈ ਇੱਕ ਵੱਡਾ ਚੈਲੇਂਜ ਹੋਵੇਗਾ।
ਯੂਕੇ ਦੇ ਗਲਾਸਗੋ ਵਿੱਚ COP26 ਵਾਤਾਵਰਨ ਤਬਦੀਲੀ ਕਾਨਫੰਰਸ ਹੋ ਰਹੀ ਹੈ ਜੋ ਕਿ 13 ਦਿਨਾਂ ਤੱਕ ਚੱਲੇਗੀ।
ਇਸ ਕਾਨਫਰੰਸ ਦਾ ਹਿੱਸਾ ਕਰੀਬ 200 ਦੇਸ਼ ਹਨ ਜੋ ਵਾਤਾਵਰਨ ਤਬਦੀਲੀ ਨੂੰ ਲੈ ਕੇ ਵਿਚਾਰ ਵਟਾਂਦਰਾ ਕਰ ਰਹੇ ਹਨ।
ਦੱਸ ਦੇਇਏ ਕਿ ਇਸ ਵਾਰ ਯੂਕੇ ਸੀਓਪੀ ਦੀ 26ਵੀਂ ਕਾਨਫਰੰਸ ਦੀ ਮੇਜ਼ਬਾਨੀ ਕਰ ਰਿਹਾ ਹੈ ਜਿਸ ਵਿੱਚ ਦੁਨੀਆ ਭਰ ਦੇ ਵੱਡੇ ਲੀਡਰ ਸ਼ਾਮਲ ਹੋ ਰਹੇ ਹਨ।
ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਵੀ ਇਸ ਕਾਨਫਰੰਸ ਦਾ ਹਿੱਸਾ ਹਨ ਅਤੇ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀ ਗਲਾਸਗੋ ’ਚ ਮੌਜੂਦ ਹਨ।
ਇਸ ਵਿੱਚ ਵਾਤਾਵਰਨ ਤਬਦੀਲੀ ਨੂੰ ਲੈ ਕੇ ਵਿਚਾਰ ਵਟਾਦਰਾ ਹੋਵੇਗਾ ਅਤੇ ਸਾਰੇ ਦੇਸ਼ ਵਾਤਾਵਰਨ ਤਬਦੀਲੀ ਨੂੰ ਲੈ ਕੇ ਆਪਣੇ-ਆਪਣੇ ਦੇਸ਼ ਵਿੱਚ ਹੋ ਰਹੇ ਕੰਮ ਸਾਂਝਾ ਕਰਨਗੇ ਅਤੇ ਅਗਲਾ ਏਜੰਡਾ ਵੀ ਸੈੱਟ ਕਰਨਗੇ।
ਦੁਨੀਆ ਭਰ ਵਿੱਚ ਵਾਤਾਵਰਨ ਤਬਦੀਲੀ ਦਾ ਅਸਰ ਦੇਖਣ ਨੂੰ ਮਿਲ ਰਿਹਾ ਹੈ, ਜਿਸ ਕਾਰਨ ਤਾਪਮਾਨ ਬਹੁਤ ਜ਼ਿਆਦਾ ਵੱਧ ਗਿਆ ਹੈ।
ਬੀਬੀਸੀ ਨੇ ਆਪਣੀ ਪੜਤਾਲ ਵਿੱਚ ਦੇਖਿਆ ਹੈ ਕਿ ਲੰਘੇ 40 ਸਾਲਾਂ ਵਿੱਚ ਦੁਨੀਆ ਭਰ ਦੇ ਜ਼ਿਆਦਾਤਰ ਹਿੱਸਿਆਂ ਵਿੱਚ ਗਰਮ ਦਿਨਾਂ ਦੀ ਗਿਣਤੀ ਦੁੱਗਣੀ ਹੋ ਗਈ ਹੈ।
ਕਈ ਵੱਡੇ ਸ਼ਹਿਰ ਇਸ ਵੱਧਦੇ ਤਾਪਮਾਨ ਤੋਂ ਪਰੇਸ਼ਾਨ ਹਨ, ਜਿਸ ਕਾਰਨ ਲੋਕਾਂ ਨੂੰ ਸਾਹ ਨਾਲ ਜੁੜੀਆਂ ਦਿੱਕਤਾਂ ਅਤੇ ਹੀਟ ਸਟ੍ਰੋਕ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪਰ ਪਾਕਿਸਤਾਨ ਵਿੱਚ ਇੱਕ ਸ਼ਖ਼ਸ ਇਸ ਸਮੱਸਿਆ ਦਾ ਹੱਲ ਲੱਭਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।
ਉਹ ਦਰਖ਼ਤ ਲਗਾ ਕੇ ਸ਼ਹਿਰਾਂ ਵਿੱਚ ਜੰਗਲ ਤਿਆਰ ਕਰਨਾ ਚਾਹੁੰਦੇ ਹਨ। ਬੀਬੀਸੀ ਦੀ ਖ਼ਾਸ ਸੀਰੀਜ਼ ‘ਲਾਈਫ਼ ਐਟ 50 ਡਿਗਰੀ ਸੈਲਸੀਅਸ’ ਵਿੱਚ ਦੇਖੋ ਫਰਹਤ ਜਾਵੇਦ ਦੀ ਇਹ ਕਹਾਣੀ।
ਵਿਸ਼ਵ ਮੌਸਮ ਵਿਗਿਆਨ ਸੰਗਠਨ ਦਾ ਕਹਿਣਾ ਹੈ ਕਿ ਭਿਆਨਕ ਹੜ੍ਹਾਂ ਅਤੇ ਤੇਜ਼ ਗਰਮ ਹਵਾਵਾਂ ਵਰਗੀਆਂ ਕੁਦਰਤੀ ਆਫ਼ਤਾਂ ਹੁਣ ਇੱਕ ਨਵੀਂ ਹਕੀਕਤ ਬਣ ਗਈਆਂ ਹਨ।
ਵਾਤਾਵਰਨ ਦੀ ਸਥਿਤੀ ਬਾਰੇ 2021 ਦੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ "ਸੰਸਾਰ ਸਾਡੀਆਂ ਅੱਖਾਂ ਦੇ ਸਾਹਮਣੇ ਬਦਲ ਰਿਹਾ ਹੈ।"
ਰਿਪੋਰਟ ਦੇ ਅਨੁਸਾਰ, 2002 ਤੋਂ ਬਾਅਦ 20 ਸਾਲਾਂ ਵਿੱਚ ਔਸਤ ਤਾਪਮਾਨ ਪਹਿਲੀ ਵਾਰ ਪੂਰਵ-ਉਦਯੋਗਿਕ ਪੱਧਰ ਤੋਂ 1 ਡਿਗਰੀ ਸੈਲਸੀਅਸ ਵੱਧ ਹੋਣ ਦੀ ਸੰਭਾਵਨਾ ਹੈ।
ਇਸ ਦੇ ਨਾਲ ਹੀ 2021 ਵਿੱਚ ਗਲੋਬਲ ਸਮੁੰਦਰ ਦਾ ਪੱਧਰ ਇੱਕ ਨਵੀਂ ਉਚਾਈ 'ਤੇ ਪਹੁੰਚ ਗਿਆ ਹੈ।
ਗਲਾਸਗੋ 'ਚ ਹੋ ਰਹੇ 26ਵੇਂ ਸੰਯੁਕਤ ਰਾਸ਼ਟਰ ਜਲਵਾਯੂ ਸੰਮੇਲਨ ਦੇ ਮੱਦੇਨਜ਼ਰ ਵਿਸ਼ਵ ਮੌਸਮ ਵਿਗਿਆਨ ਸੰਗਠਨ (ਡਬਲਯੂ.ਐੱਮ.ਓ.) ਨੇ ਸਾਲ 2021 ਦੇ ਸ਼ੁਰੂ 'ਚ ਨਵੇਂ ਅੰਕੜੇ ਜਾਰੀ ਕੀਤੇ ਹਨ।
ਰਿਪੋਰਟ ਵਿੱਚ ਤਾਪਮਾਨ, ਅਤਿ ਜਲਵਾਯੂ ਘਟਨਾਵਾਂ, ਸਮੁੰਦਰ ਦੇ ਪੱਧਰ ਵਿੱਚ ਵਾਧਾ ਅਤੇ ਸਮੁੰਦਰੀ ਸਥਿਤੀਆਂ ਸਮੇਤ ਜਲਵਾਯੂ ਸੂਚਕਾਂ ਦੀ ਰੂਪ ਰੇਖਾ ਦੱਸੀ ਗਈ ਹੈ।
ਅਧਿਐਨ 'ਚ ਕਿਹਾ ਗਿਆ ਹੈ ਕਿ ਵਾਯੂਮੰਡਲ 'ਚ ਗ੍ਰੀਨਹਾਊਸ ਗੈਸਾਂ ਦੇ ਰਿਕਾਰਡ ਪੱਧਰ 'ਤੇ ਜਮ੍ਹਾ ਹੋਣ ਕਾਰਨ ਇਸ ਸਾਲ ਸਮੇਤ ਪਿਛਲੇ 7 ਸਾਲਾਂ 'ਚ ਇਹ ਸਾਲ ਸਭ ਤੋਂ ਗਰਮ ਰਹਿਣ ਦੀ ਉਮੀਦ ਹੈ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਵਧਦਾ ਤਾਪਮਾਨ ਧਰਤੀ ਨੂੰ ਇੱਕ "ਅਣਜਾਣ ਖੇਤਰ" ਵਿੱਚ ਲੈ ਜਾ ਰਿਹਾ ਹੈ। ਪੂਰੇ ਗ੍ਰਹਿ 'ਤੇ ਇਸ ਦਾ ਪ੍ਰਭਾਵ ਵਧ ਰਿਹਾ ਹੈ।
ਡਬਲਯੂਐਮਓ ਦੇ ਪ੍ਰੋਫੈਸਰ ਪੈਟਰੀ ਟਾਲਸ ਨੇ ਕਿਹਾ, "ਬਹੁਤ ਜ਼ਿਆਦਾ ਜਲਵਾਯੂ ਘਟਨਾਵਾਂ ਆਮ ਹੋ ਗਈਆਂ ਹਨ। ਇਸ ਗੱਲ ਦੇ ਵਧ ਰਹੇ ਵਿਗਿਆਨਕ ਸਬੂਤ ਹਨ ਕਿ ਇਹਨਾਂ ਵਿੱਚੋਂ ਕੁਝ ਲਈ ਮਨੁੱਖੀ ਕਾਰਨ ਵਾਤਾਵਰਨ ਤਬਦੀਲੀ ਜ਼ਿੰਮੇਵਾਰ ਹੈ।"
ਗ੍ਰੇਟਾ ਥਨਬਰਗ ਨੇ ਵਾਤਾਵਰਨ ਕਾਰਕੁਨਾਂ ਦੇ ਸੜਕ ਰੋਕਣ ਦਾ ਸਮਰਥਨ ਕਰਦੇ ਹੋਏ ਕਿਹਾ, ''ਕਦੇ-ਕਦੇ ਲੋਕਾਂ ਨੂੰ ਗੁੱਸਾ ਦਵਾਉਣਾ ਪੈਂਦਾ ਹੈ।''
ਵਾਤਾਵਰਨ ਤਬਦੀਲੀ ਸੰਮੇਲਨ COP26 ਵਿੱਚ ਹਿੱਸਾ ਲੈਣ ਲਈ ਗਲਾਸਗੋ ਪਹੁੰਚੀ ਗ੍ਰੇਨਾ ਨੇ ਇਹ ਵੀ ਦੱਸਿਆ ਇਸ ਗੱਲ ਦਾ ਖ਼ਿਆਲ ਰੱਖਿਆ ਜਾਵੇ ਕਿ ਕਿਸੇ ਨੂੰ ਸੱਟ ਨਾ ਲੱਗੇ
Climate Change: ਪੰਜਾਬ ਵਿੱਚ 'ਮਿੰਨੀ ਜੰਗਲ' ਬਣਾਉਣ ਵਾਲੇ ਕੁਝ ਲੋਕਾਂ ਅਤੇ ਵਾਤਾਵਰਨ ਮਾਹਰ ਡਾ. ਵੀ ਕੇ ਗਰਗ ਨਾਲ ਬਾਘਾਪੁਰਾਣਾ (ਮੋਗਾ) ਤੋਂ ਗੱਲਬਾਤ ਕਰ ਰਹੇ ਹਨ ਬੀਬੀਸੀ ਪੱਤਰਕਾਰ ਖ਼ੁਸ਼ਹਾਲ ਲਾਲੀ
(ਕੈਮਰਾ - ਮਯੰਕ ਮੋਂਗੀਆ)
ਵਾਤਾਵਰਨ ਤਬਦੀਲੀ ਦਾ ਅਸਰ ਦੁਨੀਆ ਭਰ ’ਚ ਵੇਖਣ ਨੂੰ ਮਿਲਿਆ ਹੈ। ਪੰਜਾਬ ਵੀ ਇਸ ਤੋਂ ਬੱਚ ਨਹੀਂ ਪਾਇਆ ਹੈ।
ਪੰਜਾਬ ਇੱਕ ਖੇਤੀ ਪ੍ਰਧਾਨ ਸੂਬਾ ਹੈ।
ਵਾਤਾਵਰਨ ਤਬਦੀਲੀ ਦਾ ਅਸਰ ਕਿਸਾਨਾਂ ’ਤੇ ਸਿੱਧੇ ਤੌਰ ’ਤੇ ਹੋ ਰਿਹਾ ਹੈ। ਇਸ ਬਾਰੇ ਲੁਧਿਆਣਾ ਵਿਖੇ ਕੁਝ ਕਿਸਾਨਾਂ ਅਤੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੇ ਵਾਤਾਵਰਨ ਤਬਦੀਲੀ ਵਿਭਾਗ ਦੇ ਮੁਖੀ ਡਾ. ਪ੍ਰਭਜਯੋਤ ਕੌਰ ਸਿੱਧੂ ਨਾਲ ਬੀਬੀਸੀ ਪੱਤਰਕਾਰ ਅਰਵਿੰਦਰ ਛਾਬੜਾ ਨੇ ਖ਼ਾਸ ਗੱਲਬਾਤ ਕੀਤੀ।
ਡਾ. ਪ੍ਰਭਜਯੋਤ ਕੌਰ ਸਿੱਧੂ ਨੇ ਦੱਸਿਆ ਕਿ ਪੰਜਾਬ ’ਚ ਪਿਛਲੇ ਕਰੀਬ 50 ਸਾਲਾਂ ’ਚ ਰਾਤ ਦਾ ਤਾਪਮਾਨ ਅਤੇ ਹਵਾ ’ਚ ਨਮੀ ਵੱਧ ਗਈ ਹੈ। ਇਸ ਦੇ ਨਾਲ ਹੀ ਸੂਰਜੀ ਘੰਟੇ ਵੀ ਘੱਟ ਗਏ ਹਨ।
ਬਾਰਿਸ਼ਾਂ ਦਾ ਪੈਟਰਨ ਵੀ ਬਦਲ ਗਿਆ ਹੈ। ਕਿਸਾਨਾਂ ਨੇ ਦੱਸਿਆ ਕਿ ਹੁਣ ਪਾਣੀ ਲਈ ਬੋਰਵੈੱਲ ਬਹੁਤ ਡੂੰਘੇ ਖੋਦਣੇ ਪੈ ਰਹੇ ਹਨ।
ਪੰਜ ਦਰਿਆਵਾਂ ਵਾਲੇ ਪੰਜਾਬ ’ਚ ਹੁਣ ਪਾਣੀ ਵੀ ਮੁੱਲ ਦਾ ਖਰੀਦਣਾ ਪੈ ਰਿਹਾ ਹੈ।
ਕਿਸਾਨਾਂ ਨੇ ਕਿਹਾ ਕਿ ਪਹਿਲਾਂ ਤਾਂ ਜ਼ਮੀਨ ਪੁੱਟਦਿਆਂ ਹੀ ਪਾਣੀ ਮਿਲ ਜਾਂਦਾ ਸੀ ਪਰ ਹੁਣ ਪਾਣੀ ਦੀ ਕਿੱਲਤ ਬਹੁਤ ਵੱਧ ਗਈ ਹੈ। ਅਤੇ ਕਿਸਾਨਾਂ ਨੂੰ ਕਾਫੀ ਪਰੇਸ਼ਾਨੀ ਝਲਣੀ ਪੈ ਰਹੀ ਹੈ।
ਇਸ ਬਾਬਤ ਡਾ. ਪ੍ਰਭਜਯੋਤ ਨੇ ਦੱਸਿਆ ਕਿ ਅਸੀਂ ਪਿਛਲੇ ਕੁਝ ਸਾਲਾਂ ਤੋਂ ਪਾਣੀ ਦੀ ਵਰਤੋਂ ਇੰਨੀ ਜ਼ਿਆਦਾ ਵੱਧ ਗਈ ਹੈ ਕਿ ਜ਼ਮੀਨ ਹੇਠਾਂ ਪਾਣੀ ਦਾ ਪੱਧਰ ਵੀ ਘੱਟ ਗਿਆ ਹੈ।
ਗਲਾਸਗੋ ਵਿੱਚ COP26 ਕਾਨਫਰੰਸ 31 ਅਕਤੂਬਰ ਤੋਂ ਸ਼ੁਰੂ ਹੋ ਗਈ ਹੈ। ਇਸ 13 ਦਿਨਾਂ ਦੀ ਕਾਨਫਰੰਸ ਨੂੰ COP26 ਕਾਨਫਰੰਸ ਕਿਹਾ ਜਾਂਦਾ ਹੈ, ਜਿਸਦਾ ਅਰਥ ਹੈ - 'ਕਾਨਫਰੰਸ ਆਫ਼ ਪਾਰਟੀਜ਼'।
ਗਲਾਸਗੋ ਦਾ ਏਜੰਡਾ ਬਹੁਤ ਵੱਡਾ ਹੈ, ਪਰ ਉਨ੍ਹਾਂ ਵਿੱਚੋਂ ਸਭ ਤੋਂ ਅਹਿਮ ਅਤੇ ਮਹੱਤਵਪੂਰਨ ਪੈਰਿਸ ਸਮਝੌਤੇ ਦੇ ਨਿਯਮਾਂ ਨੂੰ ਅੰਤਿਮ ਰੂਪ ਦੇਣਾ ਹੈ।
ਸਾਲ 2015 ਵਿੱਚ, ਵਾਤਾਵਰਨ ਤਬਦੀਲੀ ਨੂੰ ਲੈ ਕੇ ਪੈਰਿਸ ਸਮਝੌਤੇ 'ਤੇ ਦਸਤਖ਼ਤ ਕੀਤੇ ਗਏ ਸਨ।
ਇਸ ਦਾ ਮਕਸਦ ਕਾਰਬਨ ਗੈਸਾਂ ਦੇ ਨਿਕਾਸ ਨੂੰ ਘਟਾ ਕੇ ਦੁਨੀਆ ਭਰ ਦੇ ਵਧਦੇ ਤਾਪਮਾਨ ਨੂੰ ਰੋਕਣਾ ਸੀ ਤਾਂ ਜੋ ਇਹ 1.5 ਤੋਂ 2 ਡਿਗਰੀ ਸੈਲਸੀਅਸ ਤੋਂ ਵੱਧ ਨਾ ਵਧੇ।
ਇਸ ਤੋਂ ਬਾਅਦ ਦੁਨੀਆ ਦੇ ਦੇਸ਼ਾਂ ਨੇ ਆਪਣੀ ਮਰਜ਼ੀ ਨਾਲ ਆਪਣੇ ਲਈ ਟੀਚੇ ਤੈਅ ਕੀਤੇ ਸਨ।
ਸੰਯੁਕਤ ਰਾਸ਼ਟਰ ਦੇ ਤਾਜ਼ਾ ਅਨੁਮਾਨਾਂ ਅਨੁਸਾਰ ਮੌਜੂਦਾ ਸਮੇਂ ਵਿੱਚ ਵੱਖ-ਵੱਖ ਦੇਸ਼ਾਂ ਵੱਲੋਂ ਮਿੱਥੇ ਗਏ ਟੀਚਿਆਂ ਕਾਰਨ ਇਸ ਸਦੀ ਦੇ ਅੰਤ ਤੱਕ ਦੁਨੀਆ ਦਾ ਤਾਪਮਾਨ 2.7 ਡਿਗਰੀ ਸੈਲਸੀਅਸ ਤੱਕ ਵਧ ਜਾਵੇਗਾ।
ਇਸ ਲਈ ਜਲਵਾਯੂ ਤਬਦੀਲੀ ਦੇ ਮਾੜੇ ਪ੍ਰਭਾਵਾਂ ਨਾਲ ਨਜਿੱਠਣਾ ਹੋਰ ਵੀ ਜ਼ਰੂਰੀ ਹੋ ਜਾਂਦਾ ਹੈ।
ਗਲਾਸਗੋ ਵਿੱਚ ਇਹੀ ਗੱਲ ਬਾਰੇ ਚਰਚਾ ਕੀਤੀ ਜਾਵੇਗੀ ਕਿ ਇਸ ਵਾਰ 2 ਡਿਗਰੀ ਸੈਲਸੀਅਸ ਤੱਕ ਤਾਪਮਾਨ ਦਾ ਵਾਧਾ ਕਰਨਾ ਕੰਮ ਨਹੀਂ ਕਰੇਗਾ।
ਦੁਨੀਆ ਦੇ ਸਾਰੇ ਦੇਸ਼ਾਂ ਨੂੰ ਮਿਲ ਕੇ ਸੰਕਲਪ ਕਰਨਾ ਹੋਵੇਗਾ ਕਿ ਤਾਪਮਾਨ 1.5 ਡਿਗਰੀ ਸੈਲਸੀਅਸ ਤੋਂ ਵੱਧ ਨਾ ਵਧਣ ਦਿੱਤਾ ਜਾਵੇ।
ਇਸ ਵਾਰ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਇਸ ਕਾਨਫਰੰਸ ਵਿੱਚ ਆਏ ਹਨ।
ਭਾਰਤ ਵੱਲੋਂ ਵਾਤਾਵਰਨ ਮੰਤਰੀ ਭੂਪੇਂਦਰ ਯਾਦਵ ਰਹਿਣਗੇ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀ ਇਸ ਵਿੱਚ ਹਿੱਸਾ ਲੈਣ ਪਹੁੰਚੇ ਹਨ।
Climate Change: ਵਾਤਾਵਰਨ ਤਬਦੀਲੀ ਬਾਰੇ ਲੁਧਿਆਣਾ ਵਿਖੇ ਕੁਝ ਕਿਸਾਨਾਂ ਅਤੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੇ ਵਾਤਾਵਰਨ ਤਬਦੀਲੀ ਵਿਭਾਗ ਦੇ ਮੁਖੀ ਡਾ. ਪ੍ਰਭਜਯੋਤ ਕੌਰ ਸਿੱਧੂ ਨਾਲ ਗੱਲ ਕਰ ਰਹੇ ਹਨ ਬੀਬੀਸੀ ਪੱਤਰਕਾਰ ਅਰਵਿੰਦਰ ਛਾਬੜਾ
(ਕੈਮਰਾ - ਗੁਲਸ਼ਨ ਕੁਮਾਰ)
ਭਾਰਤ ਨੂੰ ਪਿਛਲੇ ਇੱਕ ਸਾਲ ਵਿੱਚ ਸੋਕੇ, ਬੇਮੌਸਮੀ ਬਾਰਸ਼, ਹੜ੍ਹ ਅਤੇ ਤੂਫ਼ਾਨ ਵਰਗੀਆਂ ਕੁਦਰਤੀ ਆਫ਼ਤਾਂ ਕਾਰਨ 87 ਅਰਬ ਡਾਲਰ ਦਾ ਨੁਕਸਾਨ ਹੋਇਆ ਹੈ।
ਇਹ ਅੰਕੜਾ ਵਿਸ਼ਵ ਮੌਸਮ ਵਿਗਿਆਨ ਸੰਸਥਾ ਵੱਲੋਂ ਜਾਰੀ ਕੀਤਾ ਗਿਆ ਹੈ।
ਇਸ ਮਾਮਲੇ 'ਚ ਭਾਰਤ ਤੋਂ ਸਿਰਫ ਚੀਨ ਹੀ ਅੱਗੇ ਹੈ, ਜਿਸ ਦਾ ਪਿਛਲੇ ਇੱਕ ਸਾਲ 'ਚ 238 ਅਰਬ ਡਾਲਰ ਦਾ ਨੁਕਸਾਨ ਹੋਇਆ ਹੈ।
ਮਾਹਿਰ ਇਸ ਨੁਕਸਾਨ ਨੂੰ ਵਾਤਾਵਰਨ ਤਬਦੀਲੀ ਨਾਲ ਜੋੜ ਕੇ ਵੇਖਦੇ ਹਨ।
ਇਹੀ ਕਾਰਨ ਹੈ ਕਿ ਭਾਰਤ ਸਮੇਤ ਦੁਨੀਆ ਦੇ ਲਗਭਗ 120 ਦੇਸ਼ ਬ੍ਰਿਟੇਨ ਦੇ ਗਲਾਸਗੋ ਸ਼ਹਿਰ 'ਚ ਇਕੱਠੇ ਹੋ ਰਹੇ ਹਨ ਤਾਂ ਜੋ ਦੁਨੀਆ ਇਕੱਠੇ ਬੈਠ ਕੇ ਵਾਤਾਵਰਨ ਤਬਦੀਲੀ ਅਤੇ ਇਸ ਦੇ ਖਤਰੇ ਨਾਲ ਨਜਿੱਠਣ ਲਈ ਕਦਮ ਚੁੱਕ ਸਕੇ।
ਦਿੱਲੀ, ਉੱਤਰਾਖੰਡ ਤੋਂ ਕੇਰਲ, ਗੁਜਰਾਤ ਤੋਂ ਪੱਛਮੀ ਬੰਗਾਲ ਅਤੇ ਅਸਾਮ ਤੱਕ ਦੇ ਲੋਕਾਂ ਨੇ ਬਦਲਦੇ ਤਾਪਮਾਨ ਕਾਰਨ ਇਨ੍ਹਾਂ ਤਬਦੀਲੀਆਂ ਨੂੰ ਬਹੁਤ ਨੇੜਿਓਂ ਮਹਿਸੂਸ ਕੀਤਾ ਹੈ।
ਇਨ੍ਹਾਂ ਬਦਲਾਵਾਂ ਦੇ ਮੱਦੇਨਜ਼ਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਗਲਾਸਗੋ ਦੌਰਾ ਮਹੱਤਵਪੂਰਨ ਬਣ ਜਾਂਦਾ ਹੈ, ਜਿੱਥੇ ਦੁਨੀਆ ਦੇ ਸਾਰੇ ਵੱਡੇ ਦੇਸ਼ ਦੁਨੀਆ ਦੇ ਬਦਲਦੇ ਤਾਪਮਾਨ ਨੂੰ ਲੈ ਕੇ ਚਰਚਾ ਕਰਨ ਜਾ ਰਹੇ ਹਨ।
ਦੁਨੀਆ ਭਰ ਵਿੱਚ ਹੋ ਰਹੀ ਵਾਤਾਵਰਨ ਤਬਦੀਲੀ ਬਾਰੇ 'ਦਿ ਐਨਰਜੀ ਐਂਡ ਰਿਸੋਰਸਿਸ ਇੰਸਟੀਚਿਊਟ' (TERI) ਤੋਂ ਮਾਹਰ ਰੀਤੂ ਮਾਥੁਰ ਨਾਲ ਦਿੱਲੀ ਦੇ ਵਿਜੇ ਚੌਂਕ ਵਿਖੇ ਗੱਲਬਾਤ ਕਰ ਰਹੇ ਹਨ ਬੀਬੀਸੀ ਪੱਤਰਕਾਰ ਨਿਤਿਨ ਸ਼੍ਰੀਵਾਸਤਵ
ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਂ ਨੇ ਇਲਜ਼ਾਮ ਲਾਇਆ ਹੈ ਕਿ ਆਸਟਰੇਲੀਆ ਦੇ ਪ੍ਰਧਾਨ ਮੰਤਰੀ ਸਕਾਟ ਮੌਰੀਸਨ ਨੇ ਪਣਡੁੱਬੀ ਸੌਦੇ ਬਾਰੇ ਉਨ੍ਹਾਂ ਨਾਲ ਝੂਠ ਬੋਲਿਆ।
ਜਦੋਂ ਮੈਕਰੋਂ ਨੂੰ ਪੁੱਛਿਆ ਗਿਆ ਕਿ ਕੀ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਸਕਾਟ ਮੌਰੀਸਨ ਝੂਠ ਬੋਲ ਰਹੇ ਹਨ, ਤਾਂ ਉਨ੍ਹਾਂ ਨੇ ਕਿਹਾ, "ਮੈਂਨੂੰ ਸਿਰਫ਼ ਇਹ ਲੱਗਦਾ ਨਹੀਂ ਹੈ, ਮੈਂ ਇਹ ਜਾਣਦਾ ਹਾਂ।"
ਇੱਕ ਅਰਬ ਡਾਲਰ ਦੀ ਪਣਡੁੱਬੀ ਬਣਾਉਣ ਲਈ ਹਾਲ ਹੀ ਵਿੱਚ ਹੋਏ ਸੌਦੇ ਕਾਰਨ ਆਸਟਰੇਲੀਆ ਅਤੇ ਫਰਾਂਸ ਦੇ ਸਬੰਧਾਂ ਵਿੱਚ ਤਣਾਅ ਆ ਗਿਆ ਹੈ।
ਆਸਟ੍ਰੇਲੀਆ ਨੇ ਫਰਾਂਸ ਨਾਲ 12 ਪਣਡੁੱਬੀਆਂ ਬਣਾਉਣ ਦਾ ਸਮਝੌਤਾ ਖ਼ਤਮ ਕਰ ਦਿੱਤਾ ਅਤੇ ਅਮਰੀਕਾ ਅਤੇ ਬ੍ਰਿਟੇਨ ਨਾਲ ਨਵੇਂ ਰੱਖਿਆ ਸਮਝੌਤੇ 'ਤੇ ਦਸਤਖ਼ਤ ਕੀਤੇ ਹਨ।
ਇਸ ਸਮਝੌਤੇ ਨੂੰ ‘ਓਕਸ’ ਕਿਹਾ ਜਾ ਰਿਹਾ ਹੈ। ਇਸ ਵਿਚ ਆਸਟਰੇਲੀਆ ਨੂੰ ਪ੍ਰਮਾਣੂ ਊਰਜਾ ਨਾਲ ਪਣਡੁੱਬੀਆਂ ਬਣਾਉਣ ਦੀ ਤਕਨੀਕ ਦਿੱਤੀ ਜਾਵੇਗੀ।
ਇਮੈਨੁਅਲ ਮੈਕਰੋਂ ਅਤੇ ਸਕਾਟ ਮੌਰੀਸਨ ਜੀ-20 ਸੰਮੇਲਨ ਵਿੱਚ ਇਸ ਮਾਮਲੇ ਤੋਂ ਬਾਅਦ ਪਹਿਲੀ ਵਾਰ ਮਿਲੇ ਸਨ।
ਜੀ-20 ਸੰਮੇਲਨ ਦੌਰਾਨ ਰਾਸ਼ਟਰਪਤੀ ਮੈਕਰੋਂ ਨੂੰ ਆਸਟਰੇਲੀਆਈ ਪੱਤਰਕਾਰ ਨੇ ਪੁੱਛਿਆ ਕਿ ਕੀ ਉਹ ਪ੍ਰਧਾਨ ਮੰਤਰੀ ਮੌਰੀਸਨ 'ਤੇ ਦੁਬਾਰਾ ਭਰੋਸਾ ਕਰ ਸਕਣਗੇ।
ਇਸ 'ਤੇ ਉਨ੍ਹਾਂ ਨੇ ਕਿਹਾ, "ਅਸੀਂ ਦੇਖਾਂਗੇ ਕਿ ਉਹ ਕੀ ਲੈ ਕੇ ਆਉਂਦੇ ਹਨ।"
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜੀ-20 ਸੰਮੇਲਨ ਤੋਂ ਬਾਅਦ ਹੁਣ ਸੰਯੁਕਤ ਰਾਸ਼ਟਰ ਦੇ 26ਵੇਂ ਵਾਤਾਵਰਨ ਤਬਦੀਲੀ ਸੰਮੇਲਨ 'ਚ ਹਿੱਸਾ ਲੈਣ ਲਈ ਗਲਾਸਗੋ ਪਹੁੰਚ ਗਏ ਹਨ।
ਪ੍ਰਧਾਨ ਮੰਤਰੀ ਮੋਦੀ ਦੋ ਦਿਨਾਂ ਦੌਰੇ 'ਤੇ ਗਲਾਸਗੋ ਪਹੁੰਚੇ ਹਨ। ਇਸ ਦੌਰਾਨ ਉਹ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਨਾਲ ਵੀ ਦੁਵੱਲੀ ਗੱਲਬਾਤ ਕਰਨਗੇ।
ਗਲਾਸਗੋ ਪਹੁੰਚਣ 'ਤੇ ਭਾਰਤੀ ਭਾਈਚਾਰੇ ਦੇ ਲੋਕਾਂ ਵੱਲੋਂ ਪੀਐਮ ਮੋਦੀ ਦਾ ਸਵਾਗਤ ਕੀਤਾ ਗਿਆ।
ਸਿਖਰ ਸੰਮੇਲਨ ਵਿੱਚ ਸ਼ਾਮਲ ਹੋਣ 'ਤੇ ਪੀਐਮ ਮੋਦੀ ਨੇ ਵੀ ਟਵੀਟ ਕੀਤਾ, "COP26 ਸੰਮੇਲਨ ਵਿੱਚ ਸ਼ਾਮਲ ਹੋ ਰਿਹਾ ਹਾਂ, ਜਿੱਥੇ ਮੈਂ ਵਾਤਾਵਰਨ ਤਬਦੀਲੀ ਨੂੰ ਧੀਮਾ ਕਰਨ ਅਤੇ ਇਸ ਸਬੰਧ ਵਿੱਚ ਭਾਰਤ ਦੇ ਯਤਨਾਂ ਨੂੰ ਸਪੱਸ਼ਟ ਕਰਨ ਲਈ ਹੋਰ ਵਿਸ਼ਵ ਨੇਤਾਵਾਂ ਨਾਲ ਕੰਮ ਕਰਨ ਦੀ ਉਮੀਦ ਕਰਦਾ ਹਾਂ।"
ਮਨੁੱਖੀ ਗਤੀਵਿਧੀਆਂ ਕਾਰਬਨ ਡਾਈਆਕਸਾਈਡ (CO2) ਦੇ ਨਿਕਾਸ ਨੂੰ ਵਧਾ ਰਹੀਆਂ ਹਨ ਜਿਸ ਕਾਰਨ ਤਾਪਮਾਨ ਵਧਦਾ ਜਾ ਰਿਹਾ ਹੈ।
ਅਤਿ ਦੀ ਸਰਦੀ ਤੇ ਅਤਿ ਦੀ ਗਰਮੀ ਦਾ ਮੌਸਮ ਅਤੇ ਧਰੁਵੀ ਬਰਫ਼ ਪਿਘਲਣਾ ਇਸ ਦੇ ਪ੍ਰਭਾਵਾਂ ਵਿੱਚੋਂ ਇੱਕ ਹੈ।
ਜਲਵਾਯੂ ਕਈ ਸਾਲਾਂ ਤੋਂ ਕਿਸੇ ਜਗ੍ਹਾ ਦਾ ਔਸਤ ਮੌਸਮ ਹੁੰਦਾ ਹੈ। ਜਲਵਾਯੂ ਤਬਦੀਲੀ ਉਨ੍ਹਾਂ ਔਸਤ ਸਥਿਤੀਆਂ ਵਿੱਚ ਆਈ ਇੱਕ ਤਬਦੀਲੀ ਹੈ।
ਵਿਸ਼ਵਵਿਆਪੀ ਪੱਧਰ 'ਤੇ ਤਾਪਮਾਨ ਵਧਣ ਦੇ ਨਾਲ ਧਰਤੀ ਹੁਣ ਤੇਜ਼ੀ ਨਾਲ ਜਲਵਾਯੂ ਤਬਦੀਲੀ ਦੇ ਦੌਰ ਵਿੱਚ ਹੈ।
ਵਾਤਾਵਰਨ ਤਬਦੀਲੀ ਬਾਰੇ ਹੋਰ ਜਾਣਕਾਰੀ ਲਈ ਇੱਥੇ ਕਲਿੱਕ ਕਰੋ।
ਯੂਕੇ ਇੱਕ ਸਿਖਰ ਸੰਮੇਲਨ ਦੀ ਮੇਜ਼ਬਾਨੀ ਕਰ ਰਿਹਾ ਹੈ ਜਿਸ ਨੂੰ ਜਲਵਾਯੂ ਤਬਦੀਲੀ ਨੂੰ ਕਾਬੂ ਵਿੱਚ ਲਿਆਉਣ ਲਈ ਅਹਿਮ ਮੰਨਿਆ ਜਾ ਰਿਹਾ ਹੈ।
ਗਲਾਸਗੋ ਵਿੱਚ 31 ਅਕਤੂਬਰ ਤੋਂ 12 ਨਵੰਬਰ ਤੱਕ ਹੋਣ ਵਾਲੀ ਮੀਟਿੰਗ ਸਾਡੀ ਰੋਜ਼ਾਨਾ ਜ਼ਿੰਦਗੀ ਵਿੱਚ ਵੱਡੀਆਂ ਤਬਦੀਲੀਆਂ ਲਿਆ ਸਕਦੀ ਹੈ।
ਇਸ ਬਾਰੇ ਹੋਰ ਜਾਣਕਾਰੀ ਲਈ ਇੱਥੇ ਕਲਿੱਕ ਕਰੋ।
ਸਾਡੇ ਲਾਈਵ ਪੇਜ 'ਤੇ ਤੁਹਾਡਾ ਸਵਾਗਤ ਹੈ। ਇਸ ਪੇਜ ਰਾਹੀਂ ਅਸੀਂ ਗਲਾਸਗੋ ਵਿੱਚ ਜਲਵਾਯੂ ਤਬਦੀਲੀ ਬਾਰੇ ਹੋ ਰਹੇ ਸਿਖਰ ਸੰਮੇਲਨ ਨਾਲ ਜੁੜੀਆਂ ਅਪਡੇਟਸ ਤੁਹਾਡੇ ਨਾਲ ਸਾਂਝੀਆਂ ਕਰਾਂਗੇ। ਇਸ ਤੋਂ ਇਲਾਵਾ ਵਾਤਾਵਰਨ ਤਬਦੀਲੀ ਨਾਲ ਜੁੜੀ ਅਹਿਮ ਜਾਣਕਾਰੀ ਵੀ ਦੇਵਾਂਗੇ।